Policia E Kosovës Sekuestron Armë Dhe Municion Në Mitrovicë Të Veriut -

Policia e Kosovës ka zhvilluar sot një aksion në veri të vendit, duke gjetur një sasi të konsiderueshme armësh dhe municioni në një shtëpi të braktisur në lagjen Bërxhane, Mitrovicë e Veriut, pas informatave të dhëna nga qytetarët.

Në vendngjarje nuk ka pasur të arrestuar. Pas gjetjes së materialit të rrezikshëm eksplodues, në aksion u përfshi edhe Njësia për Trajtimin e Mjeteve Eksplozive (NJTME), e cila ka tërhequr nga vendi i ngjarjes barutin, fishekët e kalibrave 12.7 mm dhe 20 mm, si dhe një minë kundër këmbësorik me detonator.

Gjatë aksionit u sekuestruan:

Një karikator i zbrazët për armë të gjata

Një bajonet

Shishe plastike e mbushur me saqme

Kapsula për fishekë

Sasi e barutit

Një rryp brezi ushtarak

Një minë kundër këmbësorik me detonator

Pjesë për mbushje të fishekëve

Targa të automjetit të ish-Milicisë

Tre fishekë të armës së gjuetisë

Trembëdhjetë fishekë të kalibrave të ndryshëm

Dy fishekë të kalibrit 12.7 mm

Dy fishekë të kalibrit 20 mm

Dy gëzhoja të kalibrit 12.7 mm

Një xhaketë ushtarake dimërore

Një palë doreza ushtarake

Katër këmisha të Policisë së Serbisë

Prokurori i Shtetit është njoftuar për rastin dhe ka urdhëruar iniciimin e hetimeve për veprën penale “Mbajtje në pronësi, kontroll ose posedim të paautorizuar të armëve”. Rasti mbetet nën hetime, ndërsa Policia e Kosovës falënderon qytetarët për bashkëpunimin dhe i fton ata që çdo informacion që ndihmon në ruajtjen e rendit dhe sigurisë publike ta raportojnë në numrin emergjent 192.