Kosova nderon Zahir Pajazitin, Hakif Zejnullahun dhe Edmond Hoxhën në përvjetorin e rënies
Krerët më të lartë të shtetit të Kosovës, përfaqësues të partive politike, të Komunës së Prishtinës, veteranë të luftës dhe familjarë kanë bërë homazhe pranë përmendores së heroit Zahir Pajaziti në Prishtinë, në përvjetorin e rënies së tij dhe të bashkëluftëtarëve Hakif Zejnullahu dhe Edmond Hoxha.
Në ceremoninë përkujtimore morën pjesë presidentja e Kosovës, Vjosa Osmani, kryeministri Albin Kurti, përfaqësues të institucioneve, kryetari i AAK-së, si dhe familjarë e veteranë të Ushtrisë Çlirimtare të Kosovës, të cilët theksuan sakrificën dhe rolin vendimtar të tre heronjve në rrugën drejt lirisë dhe pavarësisë së vendit.
Presidentja Osmani e vlerësoi 31 janarin si një nga datat më domethënëse në historinë e Republikës së Kosovës, duke theksuar se rënia e tre heronjve u bë burim frymëzimi për një popull të tërë në luftën kundër shtypjes shekullore. Ajo nënvizoi se sakrifica e tyre vendosi themelet mbi të cilat u ndërtua shteti i Kosovës si shtet sovran dhe i pavarur.
Ndërkohë, kryeministri Kurti e përshkroi Zahir Pajazitin si një luftëtar të palëkundur dhe një guerilas me veprimtari të jashtëzakonshme, duke theksuar se eliminimi i tij dhe i bashkëluftëtarëve ndodhi përmes pritës, si pasojë e frikës që veprimtaria e tyre kishte shkaktuar tek forcat serbe. Sipas Kurtit, rënia e tyre ndikoi drejtpërdrejt në rritjen e vetëbesimit popullor dhe në zgjerimin e radhëve të UÇK-së.
Edhe nënkryetarja e Kuvendit të Kosovës, Albulena Haxhiu, i cilësoi Zahir Pajazitin, Hakif Zejnullahun dhe Edmond Hoxhën si figura themelore të rezistencës së armatosur, duke theksuar se Pajaziti ishte ndër ideatorët dhe organizatorët e parë të Ushtrisë Çlirimtare të Kosovës.
About The Author
