UÇK bën bashkë deputetët e Parlamentit të Kosovës: Miratohet rezoluta për Gjykatën Speciale
Një ditë pas konstituimit të legjislaturës së re, Kuvendi i Kosovës ka zhvilluar një seancë të jashtëzakonshme, ku është miratuar rezoluta që lidhet me Gjykatën Speciale. Përmes këtij dokumenti, deputetët kanë kërkuar që Dhomat e Specializuara dhe Zyra e Prokurorit të Specializuar të veprojnë në përputhje të plotë me ligjin dhe standardet e së drejtës ndërkombëtare gjatë ushtrimit të mandatit të tyre. Rezoluta, e iniciuar nga Partia Demokratike e Kosovës, u mbështet nga 90 deputetë. Një deputet nga Lëvizja Vetëvendosje votoi kundër, ndërsa Lidhja Demokratike e Kosovës nuk mori pjesë në votim. Gjatë debatit, shefja e Grupit Parlamentar të LDK-së, Jehona Lushaku, propozoi që teksti të plotësohej me një pikë shtesë, e cila do të kërkonte hetimin dhe zbardhjen e vrasjeve politike të pasluftës. Megjithatë, ky propozim nuk u përfshi në versionin përfundimtar të rezolutës.
Rezoluta e miratuar nga Kuvendi i Kosovës përmban gjithsej shtatë pika.
- KËRKON nga Dhomat e Specializuara dhe Zyra e Prokurorit të Specializuar që, në ushtrimin e funksioneve të tyre, të sigurojnë zbatimin me përpikëri të standardeve kushtetuese dhe ndërkombëtare lidhur me një proces gjyqësor të drejtë dhe të paanshëm, duke respektuar gjithashtu parimet e transparencës, llogaridhënies dhe kultivimit të besimit të publikut në drejtësi.
- KËRKON nga Dhomat e Specializuara dhe Zyra e Prokurorit të Specializuar që, në ushtrimin e funksioneve të tyre, të sigurojnë zbatimin me përpikëri të standardeve kushtetuese dhe ndërkombëtare lidhur me mbrojtjen e të drejtave dhe lirive themelore të të akuzuarve, përfshirë edhe detyrimet që burojnë nga jurisprudenca e Gjykatës Evropiane për të Drejtat e Njeriut.
- KËRKON nga Ombudspersoni i Dhomave të Specializuara, përgjegjësia ekskluzive e të cilit për Dhomat e Specializuara dhe Zyrën e Prokurorit të Specializuar buron nga Kushtetuta e Republikës së Kosovës, që të veprojë me pavarësi dhe paanësi të plotë në ushtrimin e këtij funksioni, në përputhje me detyrimet kushtetuese dhe aktet e standardeve ndërkombëtare lidhur me këtë funksion.
- INKURAJON të gjitha shtetet demokratike, përfshirë ato financuese dhe mbështetëse të Dhomave të Specializuara dhe Zyrës së Prokurorit të Specializuar, të bashkohen në thirrjen tonë për respektimin e plotë të standardeve ndërkombëtare për një gjykim të drejtë dhe të paanshëm – standarde këto që burojnë nga tradita kushtetuese e të gjitha shteteve demokratike dhe akteve e rekomandimeve të miratuara nga mekanizmat ndërkombëtarë, përfshirë, por pa u kufizuar, nga Kombet e Bashkuara, Bashkimi Evropian, Këshilli i Evropës dhe Organizata për Siguri dhe Bashkëpunim në Evropë.
- INKURAJON mekanizmat monitorues për respektimin e të drejtave dhe lirive themelore në kuadër të organizatave ndërkombëtare, si dhe organizatat joqeveritare ndërkombëtare e vendore, për monitorim të shtuar të pajtueshmërisë së funksionimit të Dhomave të Specializuara dhe Zyrës së Prokurorit të Specializuar me standardet ndërkombëtare për mbrojtjen e të drejtave dhe lirive themelore në procese gjyqësore dhe raportimin e shkeljeve të evidentuara.
- KONFIRMON zotimin dhe përkushtimin për sigurimin e të gjitha mekanizmave, përfshirë ato financiare, në mbështetje të të drejtave të mbrojtjes së udhëheqësve dhe luftëtarëve të Ushtrisë Çlirimtare të Kosovës para Zyrës së Prokurorit të Specializuar dhe Dhomave të Specializuara.
- KONFIRMON zotimin dhe përkushtimin e plotë për ndërmarrjen e të gjitha veprimeve për afirmimin e vlerave të luftës së Ushtrisë Çlirimtare të Kosovës dhe shenjtërisë së historisë mbi të cilën është ndërtuar Republika e Kosovës.
Një rezolutë të tillë e ka miratuar më herët edhe Kuvendi i Republikës së Shqipërisë.
ZPS ka kërkuar 45 vjet për secilin, 180 në total, për 10 pikat e Aktakuzës duke mos hequr dorë nga asnjëra prej tyre pas gati 3 vitesh gjykim.
About The Author
